Në sallat madhështore të Muzeut Shtetëror të Hermitazhit në Shën Pjetërburg, vizitorët kanë mundësi të shohin një galeri të vërtetë arti, që pasqyron jetën e aristokracisë ruse. Mirëpo, në këtë muze, vizitorët ndeshen edhe me diçka të çuditshme. Teksa parakalojnë në hollet unike, ata mund të dëgjojnë zhurmën e largët të një mjaullime.

Në një kat poshtë këtij muzeu, që dikur ishte Pallati i Dimrit – rezidenca zyrtare e carëve në pushtet të Rusisë – janë gati 50 mace që trajtohen si “mbretër të vërtetë”. Ato ushqehen me kujdes nga stafi dhe janë gjithmonë nën mbikëqyrjen e veterinerëve. Pallati ka gjithashtu një dhomë të veçantë për macet më “antisociale” që nuk duan të qëndrojnë me macet e tjera. Megjithëse nuk lejohen të hyjnë në galeri dhe rrallë shihen nga vizitorët, sërish janë shumë të famshme.

Ndërtesa gati 3-shekullore ka qenë shtëpia e maceve që në fillim. Perandoresha Elizabeth I urdhëroi me dekret që macet të silleshin nga qyteti i Kazanit, në juglindje të Shën Pjetërburgut, për të kapur minjtë në bodrumin e pallatit. Nën sundimin e Katerinës së Madhe – e cila e pasuroi pallatin me vepra arti – nisi dhe legjenda e maceve që thuhet se ajo i quajti “ruajtësit e galerive”.

Pas shpërbërjes së Bashkimit Sovjetik në vitin 1991, vendi u përball me një krizë ekonomike aq të tmerrshme sa i detyroi njerëzit të hidhnin kafshët e tyre shtëpiake në rrugë. Muzeu vendosi të merrte disa nga macet endacake, duke shtuar kështu numrin e këtyre felinëve që strehoheshin aty.

Sot, interesi për to duket sikur zbeh edhe trashëgiminë kulturore që zotëron muzeu. Me macet në bodrum dhe sallat aristokrate ruse, sipas CNN Travel, muzeu tërheq vizitorë nga çdo cep i botës.