Ministrja e Kulturës, Saranda Bogujevci, ka njoftuar se në muzeun e njohur Hamburger Bahnhof në Berlin është dhënë premiera e operës “Syrigana” në version koncertal, në kuadër të ekspozitës “An Opera Out of Time” të artistit kosovar me famë ndërkombëtare, Petrit Halilaj, transmeton albinfo.ch.

Sipas saj, opera, e cila fillimisht ishte prezantuar në Syriganë të Drenicës, kësaj here erdhi para publikut berlinas në një formë të re artistike, duke e kthyer hapësirën e ekspozitës në një përjetim unik që bashkon muzikën, instalacionin dhe teatrin.

Bogujevci vlerësoi lart punën dhe vizionin artistik të Petrit Halilajt, duke theksuar se ai vazhdon të ndërtojë ura mes kujtesës kolektive të Kosovës dhe skenave më të rëndësishme ndërkombëtare të artit bashkëkohor.

Ajo shprehu falënderim edhe për Filharmoninë e Kosovës, artistët dhe gjithë ekipin realizues që kontribuan në këtë mbrëmje artistike të veçantë në kryeqytetin gjerman./Albinfo.ch

The post Opera “Syrigana” rikthehet në Berlin, pjesë e ekspozitës së Petrit Halilajt appeared first on Albinfo.