“Rruga e Feve” bashkon rreth 100 persona në Wil

Pas rreth dy vitesh përgatitjesh, në qytetin e Wilit në Zvicër është zhvilluar aktiviteti ndërfetar “Rruga e Feve – Së bashku nëpër Wil”, ku morën pjesë rreth 100 persona, transmeton albinfo.ch.

Takimi nisi në Kishën St. Peter, ku pjesëmarrësit u njohën me rolin dhe pozitën e gruas në katolicizëm.

Më pas, pjesëmarrësit vazhduan së bashku drejt Xhamisë së Wilit, ku u pritën nga përfaqësuesit e komunitetit mysliman. Imam Enes Koshi lexoi pjesë nga Kurani, ndërsa imam Bekim Alimi bëri përkthimin dhe prezantoi shkurtimisht xhaminë.

Alimi foli gjithashtu për temën “Gruaja në Islam”, ndërsa imam Makbul Idrisi udhëhoqi namazin, të cilin pjesëmarrësit patën mundësi ta përcillnin nga afër.

Rrugëtimi vazhdoi drejt Kreuzkirche, ku u prezantua roli dhe pozita e gruas në protestantizëm.

Aktiviteti përfundoi me një apero të përbashkët, duke krijuar hapësirë për biseda dhe shkëmbim të drejtpërdrejtë mes pjesëmarrësve.

Përmes këtij aktiviteti, organizatorët synuan të krijojnë mundësi që njerëzit e besimeve të ndryshme të njihen më nga afër, të dëgjojnë njëri-tjetrin dhe të zbulojnë vlerat që i bashkojnë.

“Ecëm së bashku, dëgjuam njëri-tjetrin, biseduam, mësuam dhe zbuluam shumë gjëra që na bashkojnë”, u tha në përshkrimin e aktivitetit.

Mesazhi kryesor i “Rrugës së Feve” ishte se dialogu dhe takimi i drejtpërdrejtë mund të ndërtojnë ura mes komuniteteve dhe të kontribuojnë në forcimin e bashkëjetesës.

Aktiviteti u mbyll me falënderime për të gjithë pjesëmarrësit dhe organizatorët, ndërsa Wil u përshkrua si një qytet ku bashkëjetesa dhe dialogu ndërfetar mund të marrin jetë përmes takimeve të tilla./Albinfo.ch