Filmi “The Disparaged” është prezantuar në kuadër të Festivalit të Filmit në Winterthur, duke sjellë në vëmendje një bashkëpunim artistik e kulturor mes Zvicrës dhe Kosovës, shkruan albinfo.ch.

Në shfaqjen e filmit morën pjesë të ftuar nga komuniteti shqiptar, ndër ta edhe përfaqësues të Ambasadës së Kosovës në Zvicër. Aktiviteti u organizua në prani të regjisores Xheni Alushi dhe producentes Adele Gjoka.

Në këtë produksion interpretojnë aktorët Luan Jaha dhe Drita Kabashi, ndërsa një veçori e projektit është mënyra e realizimit të tij: filmi është prodhuar dhe financuar tërësisht në Zvicër, përmes Universitetit të Arteve të Cyrihut (ZHdK), në bashkëprodhim me Papafingo Productions.

Megjithatë, xhirimet janë zhvilluar në Prishtinë, me një kast aktorësh dhe ekip realizues kryesisht nga Kosova.

Ky projekt përfaqëson një tjetër bashkëpunim në fushën e kinematografisë mes dy vendeve, duke krijuar hapësirë për përfshirjen e artistëve shqiptarë në projekte ndërkombëtare.

Pjesëmarrësit kanë përgëzuar regjisoren, producenten, aktorët dhe gjithë ekipin realizues për punën dhe kontributin në promovimin e artit dhe kulturës shqiptare./Albinfo.ch

The post Filmi shqiptar “The Disparaged” prezantohet në Festivalin e Filmit në Winterthur appeared first on Albinfo.