Violinisti i njohur shqiptar Shkëlzen Doli ka shënuar një përvjetor të rëndësishëm në karrierën e tij, 30 vjet nga bashkimi me Filarmoninë e Vjenës, një nga orkestrat më prestigjioze në botë, përcjell albinfo.ch.
“Këtë qershor shënohet një përvjetor tejet i veçantë për mua: 30 vjet që kur kam pasur nderin dhe privilegjin të bashkohem me një nga orkestrat më të shquara në botë – Filarmoninë e Vjenës.”
Në një rrëfim të ndjerë, Doli kujton emocionet e audicionit të parë në vitin 1995 dhe rrugëtimin e tij të jashtëzakonshëm si pjesë e këtij institucioni me mbi 180 vite histori muzikore.
“Kur isha në audicion në vitin 1995, kurrë nuk do ta kisha parashikuar se sa do të ndikonte kjo ditë në karrierën time,” shkruan ai, duke shtuar se ndjehet mirënjohës pa masë që Filarmonia e Vjenës formoi përvojat e tij të para si muzikant orkestre dhe i dha mundësinë të mësojë interpretimin mjeshtëror të muzikës klasike.
Gjatë këtyre tre dekadave, Doli ka pasur privilegjin të punojë me disa prej dirigjentëve më të shquar të shekullit, si Sir Georg Solti, Claudio Abbado, Zubin Mehta, Riccardo Muti, Daniel Barenboim, Gustavo Dudamel, John Williams dhe shumë të tjerë.
“Pavarësisht rrotullimit gjenerativ të kolegëve që atëherë, thelbi i orkestrës sonë, synimi ynë i pandërprerë për përsosmëri, ka mbetur i njëjtë,” shkruan Doli me krenari.
Me një karrierë të gjatë dhe të pasur në zemër të muzikës klasike evropiane, Shkëlzen Doli mbetet një prej figurave më të respektuara shqiptare në skenën muzikore ndërkombëtare, duke dëshmuar përkushtim, mjeshtëri dhe dashuri të pakushtëzuar për artin e tij.
The post 30 Vjet me Filarmoninë e Vjenës, Shkëlzen Doli: Një udhëtim i jashtëzakonshëm muzikor appeared first on Albinfo.