Ansambli Kombëtar i Këngëve dhe Valleve “Shota” ka mirëpritur në Prishtinë Korin e qytetit të Linköping-ut nga Suedia, në një takim që ndërthuri muzikën, traditën dhe shkëmbimin kulturor ndërmjet dy vendeve, shkruan albinfo.ch.
Në këtë vizitë, kori suedez u shoqërua edhe nga profesori i asociuar Florim Grajçevci, dekan i Fakultetit të Inxhinierisë së Ndërtimit.
Pjesë e veçantë e takimit ishte edhe interpretimi instrumental nga Åke Björn, kardiolog në Universitetin e Linköping-ut, i cili në të kaluarën kishte qenë pjesë e ekipeve mjekësore humanitare që kontribuuan në trajtimin e anomalive komplekse te fëmijët në Qendrën Klinike Universitare të Kosovës (QKUK).
Në kuadër të vizitës, “Shota” organizoi një koncert mirëseardhjeje për mysafirët suedezë, duke u ofruar atyre mundësinë të njiheshin më nga afër me trashëgiminë kulturore shqiptare.
Përmes këngëve, valleve dhe veshjeve tradicionale, përfaqësuesit e korit nga Linköping-u u njohën me historinë, traditën dhe rrugëtimin ndër vite të ansamblit kombëtar.
Takimi u shndërrua gjithashtu në një mundësi për shkëmbimin e përvojave artistike dhe forcimin e lidhjeve kulturore ndërmjet Kosovës dhe Suedisë.
Kjo vizitë dëshmon edhe një herë rolin e artit dhe muzikës në afrimin e njerëzve dhe krijimin e urave të miqësisë ndërmjet popujve./Albinfo.ch
VIDEO
The post Ansambli “Shota” mirëpret korin suedez nga Linköping-u, arti forcon miqësinë Kosovë–Suedi appeared first on Albinfo.