Sezona e verës në vendlindje i sjell edhe shumicën e bashkatdhetarëve tanë.
Muaji korrik dhe gusht janë zakonisht pika e bashkimit të familjarëve në Kosovë me ata që jetojnë jashtë vendit.
E për këtë arsye, shumë komuna të Kosovës kanë organizuar ngjarje të ndryshme për të mirëpritur ardhjen e bashkatdhetarëve. Ngjashëm ka vepruar edhe Komuna e Drenasit, vetëm se me një program mjaft të gjatë e të përmbushur, për plot një muaj.
Nga data 20 korrik e deri më 20 gusht, në sheshin “Fehmi Lladrovci” në Drenas do të mbahet festivali “Muaji i Mërgatës”.
Artistë të mirënjohur, vendorë e të huaj, do të jenë prezentë në net të paharrueshme e spektakulare të përgatitura për qytetarët e Drenasit e gjithë Kosovës, e posaçërisht për bashkatdhetarët.
Lidhur me këtë festival, përmes një postimi në Facebook ka njoftuar edhe Komuna e Drenasit, ku ka publikuar një fotografi nga takimi i kryetarit të Drenasit, z.Ramiz Lladrovci dhe Drejtoreshës për Kulturë, Rini dhe Sport, znj. Laureta Thaçi, me themeluesin dhe drejtorin e festivalit, artistin Robert Nuha.
Ndryshe, kjo është hera e katërt që Muaji i Mërgatës organizohet nga artisti Robert Nuha, nën patonatin e kryetarit të Komunës së Drenasit.
The post Drenasi mirëpret bashkatdhetarët në festivalin “Muaji i Mërgatës” appeared first on Albinfo.