Faqja zyrtare e Eurovisionit [eurovision.tv] ia ka kushtuar një shkrim të detajuar grupit elektrofolk të Shqipërisë, i cili më 13 maj do të përfaqësojë kombin në skenën e Eurovisionit me këngën “Zjerm”, përcjell albinfo.ch.
Siç shkruan eurovision.tv, grupi ka një lidhje të veçantë me Kosovën, pasi momenti i këtij grupi muzikor më i paharrueshëm ka qenë koncerti i tij parë në Kosovë.
“Dyshja e ka bërë Italinë shtëpinë e tyre, por përpara se të siguronin vendin e tyre në Eurovision, ata duhej të ktheheshin në atdheun e tyre, Shqipëri, për të konkurruar në finalen kombëtare të vendit, Festivali i Këngës”.
“Ashtu si në Eurovisionin e dikurshëm, “Shkodra Elektronike” performoi me një orkestër dhe dirigjent, me këngën e tyre ‘Zjerm’, që do të thotë ‘zjarr’. Ata u përballën me 14 konkurrentë të tjerë në finale dhe pa dyshim ndezën skenën’, shkruan eurovision.tv.
Tutje portali zyrtar i Eurovisionit tregon një histori të shkurtër se si është krijuar “Shkodra Elektronike”.
“Duo u formua në vitin 2019, me një mision të qartë: të marrin këngët tradicionale të qytetit të tyre, Shkodrës dhe t’u shtojnë tinguj bashkëkohorë. Mision i përmbushur”.
“Ata kanë publikuar 4 këngë dhe një EP të regjistruar live në studio, si dhe kanë performuar në festivale të mëdha nëpër Evropë. Dhe tani mund të shtojnë në listën e tyre të arritjeve edhe konkursin më të madh muzikor në botë”.
Eurovisioni mund të jetë një moment kulmor për çdo artist, por muzika nuk ndalet këtu. Dyshja po punon aktualisht për albumin e tyre debutues, i cili përfshin edhe Korin Shqiptar të Iso-Polifonisë, një traditë muzikore e përfshirë në listën e trashëgimisë kulturore të UNESCO-s.
“Dyshja është në një mendje kur bëhet fjalë për heronjtë e tyre të Eurovisionit dhe të dy thonë se duhet të jetë ABBA, ‘sepse janë më të mirët!’. Kujtimi i tyre i parë nga Eurovisioni është performanca fituese e Waterloo-s, një moment i domosdoshëm për çdo fans të Eurovisionit.
“Momenti i tyre muzikor më i paharrueshëm ka qenë koncerti i tyre i parë në Kosovë”, shkruan Eurovision.tv.
Kujtojmë se Shqipëria këtë vit në Eurovision do të këndojë e 12 me radhë në gjysmëfinalen e parë më 13 maj.
The post Eurovision shkruan për Shkodrën Elektronike, përmend edhe Kosovën appeared first on Albinfo.