Festivali tradicional Klosterbergfest në Basel rrezikon të mos zhvillohet këtë fundjavë, pasi shoqata që qëndron pas organizimit të tij po përballet me probleme serioze financiare.
Ndaj shoqatës figurojnë detyrime dhe procedura përmbarimore në vlerë prej rreth 95 mijë frangash, ndërsa disa kompani kanë konfirmuar se ende presin pagesën e faturave të tyre, sipas SRF-së, përcjell albinfo.ch.
Presidenti i shoqatës ka pranuar ekzistencën e faturave të papaguara dhe ka deklaruar se ato do të shlyhen më vonë. Ai e ka marrë drejtimin e shoqatës në korrik të këtij viti.
Pavarësisht problemeve financiare, Kantoni Basel-Stadt ka bërë të ditur se nga këndvështrimi i autoriteteve festivali mund të zhvillohet. Për lejet dhe tarifat e përdorimit këtë vit është kërkuar pagesë paraprake, e cila është kryer.
Megjithatë, mbetet e paqartë nëse festivali do të nisë sipas planit. Disa furnizues kanë humbur besimin dhe kanë deklaruar se nuk do të ofrojnë më pajisje apo shërbime pa u paguar faturat e mëparshme.
Klosterbergfest është planifikuar të mbahet nga 28 deri më 30 gusht në Basel. Festivali tradicional organizohet që nga fundi i viteve 1970 dhe përfshin muzikë, vallëzim, gastronomi ndërkombëtare dhe aktivitete kulturore.
The post Festivali i njohur në Basel rrezikon të mos mbahet për shkak të borxheve appeared first on Albinfo.