Sot, në Mynih, në kuadër të takimit zyrtar të ministrit të Kulturës, Rinisë dhe Sportit, Hajrulla Çeku, dhe Ministrit të Kulturës të Bavarisë, Markus Blume me qëllim fuqizimin e bashkëpunimit kulturor ndërkombëtar ndërmjet Kosovës dhe Gjermanisë, është nënshkruar Marrëveshje Bashkëpunimi midis Bibliotekës Kombëtare të Kosovës “Pjetër Bogdani” dhe Bibliotekës Shtetërore të Bavarisë. Marrëveshja është nënshkruar nga Fazli Gajraku, drejtori i Bibliotekës Kombëtare të Kosovës, dhe Klaus Ceynowa, drejtori i Bibliotekës Shtetërore të Bavarisë, shkruan albinfo.ch.
Marrëveshja e Bashkëpunimit synon zhvillimin e një partneriteti të bazuar në bashkëpunimin që përfshin fushat shkencore, profesionale, të digjitalizimit dhe të veprimtarive kulturore.
Kjo Marrëveshje do të kontribuojë në zhvillimin e një bashkëpunimi bazuar në nevojat e partneritetit dhe përfitimit reciprok, përfshirë këtu: shkëmbimin e ndërsjellë të të dhënave bibliografike; mbështetje për hulumtuesit shkencorë; bashkëpunim në zhvillimin dhe implementimin e projekteve shkencore; bashkëpunim në fushën e digjitalizimit; informacion të ndërsjellë rreth botimeve me qasje të hapur; shkëmbim të ekspertizës dhe përvojës shkencore; organizim të ngjarjeve të përbashkëta si konferenca shkencore, seminare dhe ekspozita; shkëmbim të materialit informativ dhe të publikimeve.
Përfaqësuesit e Bibliotekës Kombëtare të Kosovës dhe të Bibliotekës Shtetërore të Bavarisë, do të vijojnë komunikimin për të çuar përpara, nëpërmjet hapave konkretë, bashkëpunimin midis tyre.
Kontribut të veçantë për arritjen e këtij bashkëpunimi dha Konsullata e Përgjithshme e Republikës së Kosovës në Mynih dhe Konsulli i Përgjithshëm z. Afrim Nura.
The post Marrëveshje bashkëpunimit mes të Bibliotekës Kombëtare nga Kosova dhe Bayerische Staatsbibliothek nga Gjermania appeared first on Albinfo.