Kurti bëri të ditur se programi akademik dygjuhësh anglisht-shqip ka nisur në këtë shkollë në shtator të vitit të kaluar. Ai e cilësoi atë një arritje të rëndësishme të komunitetit shqiptaro-amerikan dhe një shembull që, sipas tij, duhet të ndiqet e zgjerohet edhe në vende të tjera.
“Dy vende aleate, dy popuj miq, e për të dytin vit akademik mësim në dy gjuhë, anglisht e shqip, në një shkollë në New York”, ka shkruar Kurti, përcjell albinfo.ch.
Ai ka theksuar rëndësinë e ruajtjes së gjuhës shqipe në mërgatë, duke përmendur edhe arbëreshët e Italisë, të cilët e kanë ruajtur gjuhën e tyre për më shumë se pesë shekuj, si dhe rolin e rilindësve shqiptarë në ruajtjen e gjuhës, kulturës dhe identitetit kombëtar.
Gjatë vizitës, Kurti u ka shpërndarë nxënësve abetare, fletore pune dhe libra leximi. Ai tha se Qeveria e Kosovës do të vazhdojë të mbështesë iniciativa për mësimin e gjuhës shqipe në mërgatë.
Kurti falënderoi Mark Gjonajn dhe Drita Gjongecajn për nismën, si dhe drejtoreshën e shkollës, Stefania Cedrola Mustafa. “Gjuha shqipe, si themel i identitetit tonë, të ruhet e kultivohet brez pas brezi kudo në mërgatë”, ka shkruar ai.
The post Në një shkollë të Bronx-it, shqipja mësohet krahas anglishtes appeared first on Albinfo.