Tenori kosovar me famë ndërkombëtare, Ramë Lahaj, ka ndarë emocionet pas koncertit të mbajtur më 10 tetor në Cyrih, ku u prit nga shumë bashkatdhetarë që jetojnë dhe punojnë në Zvicër, transmeton albinfo.ch.
Përmes një mesazhi të publikuar pas koncertit, Lahaj ka shprehur krenarinë për komunitetin shqiptar, duke vlerësuar arritjet e bashkatdhetarëve në shkencë, mjekësi, politikë, afarizëm, edukim, gastronomi dhe fusha të tjera.
“Ne zemër të Cyrihut, i rrethuem me dashni e atdhedashni!”, ka shkruar tenori, duke e cilësuar praninë dhe mbështetjen e publikut shqiptar si një pjesë të veçantë të këtij rrugëtimi artistik.
Lahaj ka theksuar gjithashtu rëndësinë e ruajtjes së kulturës, gjuhës dhe këngës shqipe, pavarësisht vendit ku jetojnë shqiptarët.
“Do të udhëtojmë në çdo cep të botës ku ka shqiptarë, sepse kulturën, gjuhën e këngën që na mbajnë gjallë, nuk do t’i harrojmë kurrë”, ka shkruar ai.
Turneu i tij do të vazhdojë edhe në qytete të tjera. Gjatë këtij viti, Lahaj pritet të takohet me publikun shqiptar në Düsseldorf, Vjenë dhe Toronto, ndërsa datat e koncerteve për vitin e ardhshëm ka paralajmëruar t’i bëjë të ditura në janar.
Në fund të mesazhit, tenori ka falënderuar të gjithë ata që kontribuuan në realizimin e turneut, me një mirënjohje të veçantë për sponsorët./Albinfo.ch
The post Ramë Lahaj në Cyrih mes bashkatdhetarëve: Krenar për secilin prej jush! appeared first on Albinfo.