Arktiku po ngrohet pothuajse katër herë më shpejt se pjesa tjetër e botës dhe pasojat janë; akullnajat tërhiqen, jeta e egër vuan dhe shumë habitate zhduken me një shpejtësi rekord. Por ka edhe një kërcënim të ri, liqenet e Arktikut po thahen. Ky paralajmërim në rrafshin global të klimës vjen nga studimi i fundit i botuar në revistën Nature Climate Change, i udhëhequr nga Elizabeth Webb e Departamentit të Biologjisë në Universitetin e Floridës në Shtetet e Bashkuara.

Hulumtimi i Elizabeth Webb zbulon se liqenet e Arktikut janë tkurrur ose tharë në shumë rajone të Kanadasë veriore, Rusisë, Grenlandës, Skandinavisë dhe Alaskës gjatë 20 viteve të fundit. Liqenet e rrezikuar janë kritike për ekosistemin Arktik, pasi ato janë një burim kryesor i ujit të freskët për komunitetet dhe industritë vendase. Por speciet e kërcënuara dhe të rrezikuara, duke përfshirë zogjtë shtegtarë dhe krijesat ujore, varen gjithashtu prej tyre për mbijetesën e tyre.

Pse rënia e liqeneve është një ngjarje e papritur? Shkencëtarët parashikuan se ndryshimi i klimës fillimisht do të rriste nivelin e liqeneve si rezultat i shkrirjes së akullit të Tokës dhe do të duheshin shekuj për t’i parë ato të tkurreshin. “Megjithatë duket se shkrirja e permafrost-it, toka e ngrirë që mbulon Arktikun, shkakton tharjen e liqeneve, kjo ngadalëson ose bllokon, këtë efekt zgjerimi”, thotë Webb.

Jo vetëm temperaturat shumë të larta kontribuojnë në shkrirjen e permafrost-it, por edhe një rritje të shirave të vjeshtës. “Në fakt, uji transporton nxehtësinë në tokë dhe kjo rrit shkrirjen e akullit brenda tyre”, specifikon Webb. “Kjo është një ndihmë e mëtejshme për kullimin e ujit brenda dherave.”