Brukseli po ndërmjetëson arritjen e një marrëveshje mes Kosovës dhe Serbisë për shtyrjen e afatit të targave dhe kthimin e serbëve në institucione. Kryediplomati i BE, Josep Borrell pas takimeve të ndara me kryeministrin e Kosovës, Albin Kurti dhe presidentin e Serbisë, Aleksandër Vuçiç tashmë po zhvillon një takim të përbashkët me ta.
Pas takimit i cili ende nuk dihet se sa do të zgjasë, shefi i diplomacisë së BE do tu drejtohet gazetarëve për të dhënë më shumë detaje. Në fokus të këtij takimi janë targat dhe kthimi i serbëve në institucione.
Sot është afati i fundit para se qeveria e Kosovës të fillojë zbatimin e hapit të dytë për targat, i cili parashikon gjobitjen me 150 euro te serbëve që ende nuk i kanë konvertuar targat në RKS.
Serbët të cilën në shenjë revolte ndaj vendimit të Prishtinës braktisën institucionet, kanë paralajmëruar rezistencë . Kjo ka bërë që diplomacia Europiane të intensifikojnë punën për gjetjen e një zgjidhjeje të përkohshme, me qëllim marrëveshjen finale më vonë.
Serbia ka vendosur si kusht për përparimin e dialogut, formimin e Asociacionit dhe pezullimin e vendimit për targat, ndërsa Prishtina zyrtare ka mbrojtur vendimin me arsyetimin se është thjeshtë zbatim i marrëveshjes së Brukselit.