Nga kjo e hënë, në Kosovë fillon procesi i ngritjes së institucioneve të reja ndërsa mblidhet parlamenti i dalë nga zgjedhjet e 14 shkurtit, me 58 vende të fituara nga Lëvizja Vetëvendosje. Tashmë qeveria e re nuk lë hapësirë për debat më shumë se sa zgjedhja e presidentit. Partitë më të mëdha opozitare e kanë shprehur qartë se nuk do ta votojnë Vjosa Osmanin.
Kryetari i Lidhjes Demokratike të Kosovës, Lumir Abdixhiku megjithatë nuk përjashton mundësinë e bisedimeve me kryetaren e shtetit në detyrë.
Ndërkohë Anëtari i kryesisë së PDK-së, Betim Gjoshi shprehet se Partia Demokratike e Kosovës do të përfshihet në zgjedhjen e presidentit vetëm nëse ofrohet një kandidat konsensual i gjithë spektrit politik.
Sipas Kushtetutës së Kosovës, zgjedhja e presidentit mund të shkojë deri në tri raunde. Në dy raundet e para duhet të jenë në sallë të parlamentit të paktën 80 deputetë nga 120 sa janë gjithsej, ndërkaq në raundin e tretë, kreu i shtetit zgjidhet me 61 vota.