Një seance e jashtëzakonshme e Këshillit te Sigurimit për Kosovën është mbajtur te enjten ne mbrëmje me kërkesë të Serbisë, ku ashtu siç pritej, palët shkëmbyen akuza të ndërsjellta.
Kryeministri i Kosovës Albin Kurti, sfidoi presidentin serb Aleksandër Vuçiç, që të firmoste menjëherë Marrëveshjen e Ohrit.
“Nënshkrimi i Marrëveshjes nuk është vetëm formalitet, është garanci për implementimin e saj të plotë, përkundër ofertave të mia të përsëritura, Vuçiç ka refuzuar të nënshkruaj, prandaj e ftoj ta nënshkruajmë këtu sot menjëherë duke theksuar rolin e Kartës së OKB-së në këtë marrëdhënie, ky akt simbolik do të tregonte përkushtimin e tij për marrëdhënie paqësore”, tha Kurti.
Persa i përket vendimit të bankës qendrore për dinarin, që ishte një prej arsyeve qe Beogradi kërkoi seancën e jashtëzakonshme, Kurti tha se kjo valute nuk është ndaluar.
“Kemi dhënë aq shumë subvencione, ndihmë sociale, grante për arsim e shëndetësi për komunat me shumicë serbe, të gjithë i pranojmë dhe pa asnjë problem. Dinari nuk është ndaluar në Kosovë, qytetarët serbë mund t’i mbajnë dinarët, por Euroje është valuta e vetme si mjet pagese”, tha Kurti.
Nga ana tjeter president Vuçiç e quajti Rregulloren e bankës për dinarin, një agresion ndaj serbëve.
“Ky është sulm ndaj popullatës serbe dhe e bën situatën në Kosovë të vështirë. Prishtina po i pamundëson veprimet e të gjitha institucioneve shëndetësore, kulturore e arsimore që ofrojnë kushtet bazike. Çdo parandalim i financimit të spitaleve, shkollave e çerdheve të Serbisë është sulm i drejtpërdrejtë ndaj serbëve “, tha Vuçiç.
Vuçiç kërkoi sërish formimin e krijimit te asociacionit pasi sipas tij do ti mbronte serbet nga dhuna.
Ndërsa Ambasadorja e SHBA-ve ne OKB, Linda Thomas-Greenfield përsëriti kërkesën për shtyrje të vendimit për Dinarin serb, ndërsa kritikoi Kosovën për veprime te pakoordinuara në raport me mbylljen e institucioneve paralele serbe./vizionplus.tv