Këto janë pamjet dramatike të siguruara nga kamerat e sigurisë, ku shfaqen momentet e para të zjarrit vdekjeprurës që i mori jetën 14 personave mbrëmjen e së mërkurës në Tetovë. Gjithçka duket se ka ndodhur në më pak se 3 minuta.
Një pjesë e pacientëve kanë dalë mrekullisht nga dritarja e spitalit të improvizuar, ndërsa flakët kanë shkrumbuar strukturën pak sekonda pas largimit të tyre.
Ndërkohë, Instituti i Mjekësisë Ligjore në Maqedoninë e Veriut ka përfunduar identifikimin e vitkimave. Sipas prokurorisë, trupat e pajetë, tetë gra dhe gjashtë burra, të moshës nga 29 deri në 78 vjeç, u janë dorëzuar familjarëve.
“Në mesin e viktimave nga zjarri në spitalin e përkohshëm, kishte edhe 2 civilë, gruaja dhe vajza e njërit prej të shtruarve në spital. Megjithëse sipas protokolleve është rreptësisht e ndaluar vizita e pacientëve të infektuar me Kovid-19. Por kjo ccështje po hetohet pasi mund të kenë ndërhyrë edhe në momentin kur shpërthyen flakët. Pacientët e shpëtuar janë 12, dhe të gjithë janë mire”, u shpreh Gëzim Nuredini, koordinator i qendrës Covid në Tetovë.
Autoritetet vijojnë hetimet për të zbardhur shkaqet e tragjedisë, ndërsa Gjermania do të ndihmojë me një ekip ekspertësh të policisë Kriminale Federale. Ata do të bashkëpunojnë me Ministrinë e Brendshme për hetimin e udhëhequr nga Zyra e Prokurorit Publik.
