“Në afërsi të pikave kufitare në Jarinjë dhe në Merdarë, për shkak të protestave që po mbahen, nuk është i mundur kalimi i autobusëve dhe kamionëve që vijnë nga Kosova. Kështu ka deklaruar Ministria e Jashtme e Kosovës. Në njoftim theksohet se nuk është i sigurt as kalimi i makinave të udhëtarëve. Lajmi u bë i ditur mbrëmjen e së hënës, por pikat kufitare Bërnjak, Jarinjë dhe Merdarë vijojnë të mbeten të mbyllura edhe mëngjesin e kësaj të marte.
Ministria e Punëve të Jashtme dhe Diasporës ka bërë thirrje për të gjithë ata që kanë hyrë në territorin e Serbisë dhe po udhëtojnë drejt Kosovës, që t’i përdorin pikat kufitare në Mutivodë, Dheu i Bardhë ose të udhëtojnë përmes Maqedonisë së Veriut.
Mediat serbe thanë se rrugët janë bllokuar nga drejtues të kamionëve me mallra serbë, si shenjë revolte ndaj vendimit të autoriteteve të Kosovës për të mos lejuar hyrjen e kamionëve me targa dhe mallra serbe që nga 14 qershori. Ky vendim erdhi pasi tre pjesëtarë të policisë së Kosovës u rrëmbyen nga forcat serbe dhe po mbahen në qytetin e Kralevës në Serbi. Incidenti shtoi tensionet mes dy vendeve.
Shtetet e Bashkuara, Britania e Madhe dhe Gjermania i kanë bërë thirrje Serbisë të lirojë menjëherë policët e Kosovës. Por deri tani Beogradi nuk ka dhënë shenja se është i gatshëm ta bëjë këtë. Ndërkohë përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, u ka bërë thirrje të dyja palëve për mbajtjen e një takimi të nivelit të lartë në Bruksel. Në rast refuzimi do të ketë pasoja si për Kosovën ashtu edhe për Serbinë.