Mocioni i mosbesimit për kryeministrin, Albin Kurti është zgjidhja e vetme për ngërçin e krijuar mes Kosovës dhe aleatëve, sipas kreut të Aleancës për Ardhmërinë e Kosovës, Ramush Haradinaj.
Haradinaj thekson se Kurti po rrezikon sovranitetin dhe sigurinë kombëtare të shtetit të Kosovës, si dhe partneritetin me vendet partnere.
“Qëndrimi i Aleancës është që të iniciohet mocion mosbesimi për kryeministrin Kurti. Mocioni i mosbesimit bazohet në dy zhvillimet më të fundit. I pari është rrezikimi i sovranitetit dhe i sigurisë në veri, dhe i dyti është prishja e marrëdhënieve me SHBA-të, dhe BE-në”, është shprehur Haradinaj. “Kemi filluar komunikimin e ndërsjellë me kryetarët e partive në nivel të grupeve parlamentare, besoj që në të ardhmen do t’i japim edhe rezultatet e këtij komunikimi”, shton ai.
Nga ana tjetër, kryeministri Kurti është shprehur i vendosur në qëndrimin e tij për vendosjen e krerëve të komunave në godinat përkatëse, ndonëse ka marrë një sërë kritikash nga vendet aleate.