Këngëtarja me famë botërore Dua Lipa ka njoftuar publikimin e albumit live dhe filmit koncertal me titull “Dua Lipa (Live From Mexico)”, të regjistruar gjatë tre netëve të saj të performancave në stadiumin Estadio GNP Seguros në Mexico City, transmeton albinfo.ch.
Filmi koncertal do të ketë premierën më 21 maj në kanalin zyrtar të artistes në YouTube, ndërsa albumi live do të publikohet një ditë më vonë, më 22 maj, në platformat kryesore të streamingut. Ndërkohë, kopjet fizike të albumit janë tashmë në paraporosi dhe do të fillojnë të shpërndahen më 5 qershor.
Në trailerin promovues, Dua Lipa shfaqet emocionale duke falënderuar publikun për mbështetjen gjatë turneut të saj botëror.
“Ky turne ka qenë eksperienca më e bukur dhe më përmbushëse e karrierës sime deri më tani. Ju keni ndërtuar diçka më të madhe se një koncert. Keni ndërtuar një familje dhe unë e ndjej këtë çdo natë”, shprehet artistja.
Albumi dhe filmi janë pjesë e turneut “Radical Optimism”, i cili përfundoi me koncertet në Mexico City në dhjetor të vitit 2025. Gjatë këtij turneu, Dua Lipa interpretoi edhe këngën “Oye Mi Amor” së bashku me Fher Olvera nga grupi legjendar meksikan Maná.
Turneu përfshiu gjithsej 92 koncerte në pesë kontinente, duke shitur mbi 1.75 milionë bileta dhe duke u renditur ndër sukseset më të mëdha të karrierës së artistes.
Në albumin “Dua Lipa (Live From Mexico)” përfshihen disa nga hitet e saj më të njohura, përfshirë “Levitating”, “Physical”, “Houdini”, “Training Season”, “Don’t Start Now” dhe “New Rules”./Albinfo.ch
The post Dua Lipa publikon albumin dhe filmin koncertal “Live From Mexico” appeared first on Albinfo.
