Një kopsht tropikal magjik, gati-gati i fshehur nga syri jashtë, është ai që do të presë, thuajse krahëhapur, 32 ekipe dhe miliona turistë, që këtë nëntor, do të udhëtojnë drejt Dohas në Katar, për të ndjekur nga afër skuadrën e zemrës.
Këtu jemi në Aeroportin Ndërkombëtar të Katarit, gati në kapacitet të plotë, për të mirëpritur ekipet yje të botërorit por edhe turistët e tifozët, që kompeticionin më të famshëm të futbollit botëror, do ta ndjekin nga vendi që fitoi të drejtën për ta organizuar atë. Aeroporti ekzistonte edhe më herët por kjo pjesë e tij, është zgjeruar së fundmi, si pjesë e përgatitjes së shtetit të Lindjes së Mesme, enkas për kupën e botës.
Krenar për këtë vepër të jashtëzakonshme, drejtori i “Qatar Airways”, Akbar Al Baker, thotë se Kopshti Orkard, siç ai quhet, nuk ka të dytë në botë. Një kopsht i tillë ekziston vetëm në Hamad International airport.
Ai thotë se prej vitesh, e ka ndjerë paragjykimin e fortë, edhe mediatik, se si një vend i vogël si Katari, arriti të fitojë të drejtën për të organizuar këtë event sportiv.
Vetëm falë zgjerimit të aeroportit, tashmë mund të akomodohen në të, gatu 58 milionë pasagjerë, në rritje me 18 milionë pasagjerë, nga sa ishte në 2010 kapaciteti i tij.
Por çfarë ka të veçantë ky kopsht magjik, përveç se është ndërtuar brenda një aeroporti? Kopshti është shtëpi e 90 brendeve të ndryshme nga e gjithë bota, me një qendër tregtarë për mbi 10 mijë metra katror. Pjesë e saj, për të gjithë pasagjerët, do të jenë edhe bare e restorante, thuajse në natyrë të hapur, rrethuar me gjelbërim. Më konkretisht, pjesë e saj do të jenë 65 dyqane të shtrenjta e luksi, 35 autlete, 20 bare e restorante po ashtu.
Dizajni unik lejon rritjen e pemëve e luleve në kushte të brendshme, mjaftueshëm për ti dhënë ngjyra e jetë, edhe pjesës së brendshme të aeroportit. Orkardi, përfiton nga dritat natyrale, që ndihmon rritjen e shtimin e pemëve.
I gjithë kopshti, me lule krejt natyrale, përbëhet nga mbi 300 lloje pemësh dhe më shumë se 25 mijë bimë të ndryshme, të mbledhura nga e gjithë bota, përfshirë këtu Malajzia, Tajlanda dhe Singapori.
