Një “katastrofë mjedisore” cilësohet ngjarja e ndodhur në Chatam Islands, një nga ishujt e Zelandës së Re. Për shkaqe ende të pasqaruara, rreth 100 balena dhe disa delfinë që i shoqëronin kanë përfunduar në brigjet e ishujve duke ngordhur, pa mundësinë e ndihmës të askujt.  

Autoritetet neozelandeze deklaruan se vetëm 28 balena ishin ende gjallë kur arritën ndihmat, por pjesës më të madhe të tyre iu praktikua eutanazia me injeksion, për të përfunduar vuajtjet e kafshëve të gjora.

Ngjarje të tilla të dhimbshme nuk janë dhe aq të rralla dhe shpeshherë ndodhin për shkak të një defekti në orientim, por edhe për shkak të anijeve të shumta. Në vitin 1918 po në këto ishuj u regjistruan mijëra balena të ngordhura, po në të njëjtën mënyrë.