Lufta me gjela është një traditë shekullore në Indi, veçanërisht gjatë festave hindu. Por shpeshherë kjo praktikë shumë e diskutuar mund të sjellë probleme jo vetëm për shpendët, por edhe për pronarët dhe spektatorët e shumtë.
Ngjarja e fundit ka ndodhur në fshatin Lothunur në shtetin indian të Telanganës, ku një gjel ka vrarë pronarin e tij, me thikën që tradicionalisht i lidhet në këmbë shpendëve për të përshpejtuar fundin e dyluftimit.
Thika goditi personin e pavëmendshëm në ijë, duke i shkaktuar një gjakderdhje nga e cila nuk mbijetoi dot, edhe pas shtrimit në spital. Raste të tilla kishin ndodhur në Indi edhe në vitin 2010, ndërkohë që plagosjet janë pothuajse pjesë e përditshmërisë.
Lufta e gjelave tolerohet nga autoritetet lokale, edhe pse është në qendër të basteve të shumta klandestine.