Një prokuror rus ka bërë thirrje që reklamat e Dolce&Gabbana në Instagram ku shfaqen çiftet e të njëjtit seks duke u puthur të ndalohen në vend pas ankesës së një ligjvënësi rreth tyre.

Mikhail Romanov, një anëtar i partisë në pushtet Rusia e Bashkuar, paraqiti ankesën në lidhje me reklamat e postuara nga gjiganti i modës, pasi videoja “përmban informacion që hedh poshtë vlerat e familjes dhe propagandon marrëdhëniet seksuale jo-tradicionale”.

Të dy videot e shkurtra ishin pjesë e fushatës globale të shtëpisë së modës italiane “Dashuria është dashuri” në prag të Ditës së Shën Valentinit.

Marrëdhëniet e të njëjtit seks janë të ligjshme në Rusi, por një ligj i vitit 2013 ndalon përhapjen e “propagandës mbi marrëdhëniet seksuale jo-tradicionale” midis të rinjve rusë. Grupet e të drejtave të njeriut kanë dënuar legjislacionin, duke thënë se ai ka ndihmuar në rritjen e armiqësisë sociale ndaj homoseksualitetit.

Dolce & Gabbana nuk pranuan të komentojnë mbi rastin.

Në vitin 2018, Dolce & Gabbana u detyrua të anulonte një shfaqje në Kinë mes një reagimi kundër një fushate reklamimi që u konsiderua si raciste dhe bëri që faqe të tregtisë elektronike në Kinë të bojkotonin produktet e firmës.