Kur dy qen ndërveprojnë, duke ndjekur njëri tjetrin apo duke luftuar, nuk është e vështirë të dallosh nëse ata po luajnë apo po zihen. Gjuha e trupit të tyre e bën dallimin shumë të qartë. Por në ndryshim nga këta, gjërat janë më të ndërlikuara me macet. Kushdo që ka dy apo më shumë në shtëpi e di mirë se mund t’i shohë ato të zihen dhe të pyesë veten “a nuk po e lëndojnë njëra-tjetrën?”. Një studim i ri i publikuar në Scientific Reports  synon të zgjidhë këtë dilemë, duke identifikuar të gjitha shenjat që dallojnë një grindje lozonjare nga një grindje serioze dhe që mund të vërë në rrezik sigurinë e kafshëve.

Studimi i kryer nga një ekip nga Universiteti i Mjekësisë Veterinare në Košice, Sllovaki, u krye duke filluar nga njëqind video të ndërveprimeve të maceve. Ekipi identifikoi një sërë qëndrimesh të përsëritura në këto situata dhe i katalogoi ato në atë që quhet etogram, një liste sjelljesh, të cilat janë ndarë në gjashtë grupe:

• pasivitet (macja është e palëvizshme në një pozicion të saktë, për shembull e kërrusur në pritje për të goditur)
• luftë
• ndjekje
• ndërveprime të tjera (p.sh. afrohen me kujdes, ngrenë qimet, por edhe lëpijnë njëra-tjetrën)
• mungesa e ndërveprimeve (vëmendja e kafshëve drejtohet te një objekt i pajetë ose te vetja e tyre)
• vokalizimi

Hapi tjetër ishte për të gjetur se cilat nga këto sjellje ndodhin së bashku dhe cilat janë reciprokisht ekskluzive.

LOJË APO LUFTË? Rezultati i kësaj analize është se ndërveprimet midis maceve janë ndarë në tre kategori:

• lozonjare: përleshje fizike, por pa mjaullimë
• agoniste: përleshje fizike, por edhe kërcënime, shumë vokalizime dhe ndërveprime të shkurtra të ndjekura nga periudha pasiviteti
• e ndërmjetme: këto janë të gjitha ato ndërveprime që duken lozonjare, por që në çdo moment mund të evoluojnë në një luftë të vërtetë, dhe që për këtë arsye kërkojnë më shumë vëmendje për të identifikuar çdo shenjë rreziku.

Cili është përfundimi që mund të arrijnë ata që kanë shumë mace në shtëpi? Nëse kafshët luftojnë shpesh dhe vokalizojnë pak, kjo do të thotë se ato janë duke luajtur dhe të lumtura. Anasjelltas, macet që urrejnë njëra-tjetrën priren të shmangin kontaktin fizik kur munden, dhe të mjaullijnë më shpesh; kur vijnë në “goditje” rrezikojnë të lëndojnë njëra-tjetrën, ndryshe nga macet që luajnë. Një tregues klasik i kësaj situate është mënyra në të cilën ato ndjekin njëra-tjetrën. Nëse macet alternojnë në rolin e ndjekësit do të thotë se ato janë duke luajtur, por nëse është gjithmonë e njëjta duke ndjekur tjetrën, atëherë ka një problem.