Nga Dritan Hila

Zakoni e do që të gjykohen humbësit. E megjithatë shpesh të ndihmon fati të jesh fitimtar. Sepse fitorja dhe humbja është e verbër dhe të vjen andej nga nuk e pret.

I tillë ishte Fieri. Të gjithë e mbajnë për bastion të socialistëve. Në strategjinë e Ramës, ishte qarku që do të kompensonte humbjen në qarqet e veriut. Sipas llogarive të tij, mendonte të dilte 10 me 5. Jo më kot e kishte vënë edhe Ruçin në vendin e 10-të. Besohej se edhe me fondet e hedhura në rilindjen urbane dhe bypass-in e qytetit që e lidhte shpejt me Vlorën dhe Tiranën, objektivi ishte lehtësisht i arritshëm.

Por nuk kishin bërë mirë llogaritë. Njeriu i katapultuar nga Rama në kupolën e PS-së dhe pastaj më qarkun më të madh të vendit pas Tiranës, Armando Subashi, në 6 vitet që ishte kryetar i Bashkisë së Fierit, nuk e kishte vrarë shumë mendjen për strukturën partiake. Më shumë se një post politik e shikoi si një destinacion fundor ekonomik të tij dhe si mundësi pasurimi. Me një rreth nepotik ai ja ka dalë që të shtrihet deri në kënetën e Zvërnecit.

Rrugët e qytetit janë asfaltuar sipas miqësive që ai ka me persona të caktuar dhe jo nevoja të qytetit; rrugët e fshatrave që varen nga fondet e bashkisë, pothuaj nuk janë prekur me dorë dhe oreksi i tij ka shkuar deri në dëshirën për të vendosur drejtuesit e ndërmarrjeve të rëndësisë kombëtare si Albpetroli sipas parimit topin e kam unë dhe fusha është e imja.

Politikat e Subashit ishin të tilla që vetëm kohezion nuk krijonin. Ndaj ajo që u mendua si një shëtitje e lehtë për socialistët, rrezikoi të kthehej në një Vaterlo. Gramoz Ruçin e ndihmoi vdekja e Finos që mos të mbetej jashtë dyerve të parlamentit, ndërsa rezultati 9-6 për socialistët praktikisht ishte humbje. Falë Klosit në Berat dhe Çuçit në Gjirokastër që përmbysën trendet historike të PS-së në këto rajone dhe Tom Doshit në Shkodër që gërreu PD-në, që gazi mos kthehej në vaj.

A do të pësojë ndëshkim Subashi për politikat e tij? E mira do të ishte që dikush t’iu futej letrave të tij. Së pari për të treguar që mandati i tretë nuk është amnisti për abuzimet politike dhe ekonomike. Së dyti për të ndalur krijimin e zotërve lokalë që në një të ardhme jo të largët mund t’i imponohen edhe pushtetit qendror. Dhe ajo që është më e rëndësishmja për PS-në, se zgjedhjet lokale janë te dera.

Dhe deri atëhere PD-ja do jetë pastruar nga të gjitha mëkatet dhe nuk është çudi të rrezikojë edhe Bashkinë e Fierit. Sepse dikur në Mallakastër mjaftonte të varje xhaketën në shkopin e PS-së dhe bëheshe kryetar bashkie. Por erdhi një ditë dhe e mori PD-ja. Që mos të vijë puna që fierakët të thonë “më mirë shejtani në bashki dhe Armando në shtëpi”./dritare.net/