Kryeministri në detyrë, Avdullah Hoti vizitoi Mitrovicën, Drenasin dhe Vushtrrin ku prezantoi planin e Lidhjes Demokratike të Kosovës për rininë dhe punësimin.
Por gjatë fjalës se tij, Hoti përshëndeti edhe letrën e presidentit Joe Biden, i cili i kërkoi njohjen e Kosovës nga Serbia.
AVDULLAH HOTI
KRYEMINISTËR NË DETYRË
Advertisement“Letra e sotme e presidentit Biden e ka vulosur partneritetin që kemi ndërtuar me SHBA-të. Jemi në mes të fushatë dhe kjo letër na tregon qartë se kah duhet të orientohen qytetarët e Kosovës, dhe 14 shkurti do të mbyllet me fitoren e LDK-së dhe të partnerëve tanë. Dy kryeministrat para meje i kanë ikur procesit të dialogut, njëri me taksën e tjetri me fiksione për harta e thika. Kur e morëm ne qeverinë na u deshën dy javë për t’i hyrë procesit. Kemi mbështetjen e partnerëve. ‘Shtëpia nuk mbahet pa miq’ siç thoshte Rugova.”
Ndërkohë kandidati për kryeministër nga Lëvizja Vetëvendosje, Albin Kurti dhe presidentja ne detyrë Vjosa Osmanin, takuan qytetarët e Gjakovës. Ata e cilësuan 14 shkurtin si një referendum që do të mbahet mend nga të gjithë.
ALBIN KURTI
KANDIDAT PER KRYEMINISTER
“14 shkurti do të mbahet në mend si datë e referendumit gjithëpopullorë ku ka ndodhur vala e tretë e entuziazmit më të madh në Kosovë. 99′ çlirimi, 2008 pavarësia, dhe 14 shkurt, 2021 fitorja e gjithë juve. Pa fitu ju, nuk fitojmë as ne.”
Kryetari i Aleancës për Ardhmërinë e Kosovës ,Ramush Haradinaj mbajti tubimin e tij në qytetin e Gjakovës. Ish-Kryeministri, që tani synon postin e presidentit, foli për marrëdhëniet me BE-në dhe me Serbinë, ndërsa përshëndeti edhe qëndrimin e fundit të presidentit Biden.
RAMUSH HARADINAJ
KRYETAR I ALEANCËS PËR ARDHMËRINË E KOSOVËS
Advertisement“E gëzojmë të drejtën se nëse vonohemi, të vendosim me referendum bashkim në union me Shqipërinë. Ne kemi 21 vjet që respektojmë obligimet ndaj BE –së për antërësim e integrim, ne mund të presim edhe disa vjet, por nuk mundemi të presim pa kufi. Do të vijë një ditë që ne do të kërkojmë të drejtën tonë. Sot u vërtetua edhe nga letra e Biden për Vuçic. Duhet të jemi seriozë dhe të ruajmë Ballkanin, duke respektu kufijtë, do të ecim përpara. Kosova dhe Serbia duhet ta njohin njëra-tjetrën me kufijtë ekzistues.”
Zgjedhjet e parakohshme parlamentare do të mbahen më 14 shkurt, ndërsa votimi për 102.100 qytetarët nga diaspora ka nisur.
