Vetëm 24 orë para nisjes së zbatimit të marrëveshje për kartat e identitetit, në të gjitha pikat kufitare që çojnë nga Kosova në Serbi janë vendosur shënimet, në të cilat thuhet se mundësia e përdorimit të kartave të identitetit të Kosovës është bërë ekskluzivisht për arsye praktike, për të lehtësuar lëvizjen e qytetarëve.
Beogradi është kujdesur të sqarojë se ky hap nuk duhet të interpretohet si njohje e pavarësisë së Kosovës.
Posterat janë në gjuhën serbe dhe atë angleze për të sqaruar se tashmë dokumentet e Kosovës do të njihen edhe në Serbi. Në marrëveshjen e arritur për pak ditë më parë Beogradi ka vendosur të mos lëshojë më dokumente hyrje-dalje, siç ka ndodhur për vite me radhë.
Marrëveshja për kartat e identitetit mes Beogradit dhe Prishtinës u arrit me ndërmjetësimin e Bashkimit Europian dhe Shteteve të Bashkuara. Duke filluar nga nesër hyn në fuqi edhe vendimi i Prishtinës për targat, të cilin Aleksandër Vuçiç e ka quajtur të njëanshëm, por është detyruar të pranojë se kjo çështje ka mbetur pa zgjidhje.