Në Mal të Zi kanë nisur bisedimet për formimin e qeverisë së pakicës, ndërsa opozita ka dorëzuar një mocion mosbesimi edhe ndaj kryetarit të parlamentit, Aleksa Beçiç, i cili do të votohet këtë të hënë.
Njëkohësisht kryetar i demokratëve malazezë të cilët votuan kundër rrëzimit të qeverisë, Aleksa Beçiç i konsideron zhvillimet politike në vend si pjesë e një skenari të presidentit aktual, Milo Gjukanoviç.
ALEKSA BEÇIÇ
KRYETAR I PARLAMENTIT, MAL I ZI
“Fakti që partia me më pak deputetë në kuvend e cila ishte në pushtet, rrëzoi qeverinë, përbën një absurd historik në skenën politike të vendit tonë. Sigurisht që në këtë skenar është e përfshirë Partia Demokratike e Socialistëve e presidentit Milo Gjukanoviç, e cila ka mbajtur pushtetin në Mal të Zi për më shumë se tri dekada.”
Advertisement
Ndërsa deputeti shqiptar, Fatmir Gjeka njëkohësisht kryetar i Partisë Demokratike, vlerëson se janë krijuar kushte të reja për integrimin evropian të vendit.
FATMIR GJEKA
AdvertisementKRYETAR, PARTIA DEMOKRATIKE
“Mendojmë të ecim me hapa përpara drejt integrimit evropian duke marrë parasysh se këtë vit kemi humbur me një qeverisje të gabuar. Kemi marrë raportin më të keq qëkurse kemi filluar bisedimet me BE-në, kështu që duhet të bëjmë shumë përpjekje në këtë drejtim”.
Partitë proserbe e cilësojnë rrëzimin e qeverisë si një veprim kundër vullnetit zgjedhor në Mal të Zi. Sipas Dritan Abazoviç, ato do të lihen jashtë qeverisë së re të pakicës, e po ashtu edhe Partia e Milo Gjukanoviç.
