Qindra qytetarë nga Kosova dhe diaspora u mblodhën përpara ambienteve të gjykatës në Hagë, në mbështetje të ish-udhëheqësve të Ushtrisë Çlirimtare. Ndërsa në sallë vijonte seanca, protestës së diasporës iu bashkua edhe vajza e ish-zëdhënësit të UÇK, Jakup Krasniqi, e cila u shpreh se pret një gjykim të drejtë dhe të shpejtë.

Ndërsa ish-gjenerali, Kudusi Lame, nga protesta tha se kriminalizimi i luftës ka synim të konsiderojë me rrënjë kriminale edhe shtetin e Kosovës.

Edhe një ditë më parë, mijëra qytetarë morën pjesë në një marshim në Prishtinë në mbështetje të katër ish-drejtuesve të lartë të Ushtrisë Çlirimtare të Kosovës. Kundër ish-presidentit Hashim Thaçi, ish-kryeparlamentarëve të Kosovës, Jakup Krasniqi e Kadri Veseli si dhe ish-shefit të grupit parlamentar të Lëvizjes Vetëvendosje, Rexhep Selimi, rëndojnë gjithsej dhjetë akuza, gjashtë për krime kundër njerëzimit dhe katër për krime lufte.