Dialogu është rruga e vetme për zbutjen e tensioneve në veri të Kosovës. Kjo është deklarata e bërë nga kryeministri Rama, gjatë vizitës së tij në Beograd, ku u prit nga presidenti serb, Aleksandër Vuçiç.

Rama u shpreh se dakordësimi në bazë të planit franko-gjerman nga Kosova dhe Serbia do të sillte bashkëpunim dhe paqe në rajon.

“Ne jemi mjaftueshmërisht mësuar që t’i ndajmë opinionet tona në mënyrë të drejtpërdrejtë, të biem dakord që nuk biem dakord por kjo s’na ndalon bashkëpunimin dhe paqen. Për të punuar dhe bashkëpunuar konkretisht duhet që në momente si ky, e është një moment specifik, të evitojmë që ndarja e gjithë pikëpamjeve në publik të përkeqësojë klimën. Me kaq mjafton. Rruga e vetme është jo rruga e rritjes se tensioneve por rruga e dialogut dhe e dakordësisë mbi marrëveshjen që buron nga plani franko-gjerman. Nuk dua të përsëris ne Beograd çfarë kam thënë në Prishtinë, por dua të shtoj se askush nuk duhet të nënvlerësojë përshkallëzimin e tensionit. Të mos humbasim kohë dhe energji të pafundme me pasoja të pakthyeshme”, tha ai.

Nga ana tjetër, presidenti Vuçiç theksoi se vendet dakordësohen që Procesi i Berlinit është rruga e duhur dhe se duhet të largohen nga trashëgimia e keqe politike.

Në të njëjtën kohë, Vuçiç bëri me dije se dy liderët folën edhe për situatën në veri të Kosovës, për të cilën kishin qasje të ndryshme.