I dërguari i posaçëm për dialogun Kosovë-Serbi, Peter Sorensen mbërriti sot në Beograd ku u takua me presidentin Aleksandër Vuçiç.

Përmes një postimi, Vuçiç bëri të ditur se diskutimi mes tyre ishte i hapur dhe i drejtë.

“Unë shpreha shqetësim të veçantë për pozitën e vështirë në të cilën ndodhen serbët për shkak të lëvizjeve të shumta përshkallëzuese, të njëanshme dhe të dhunshme të Prishtinës”, shkroi Presidenti serb.

Ai akuzoi gjithashtu Kosovën se po bën pengesa të vazhdueshme në procesin e dialogut, duke përsëritur se themelimi i Asociacionit të komunave me shumicë serbe është parakusht për fillimin e një normalizimi thelbësor të marrëdhënieve. Javën e kaluar emisari europian Sorensen ishte në Kosovë ku zhvilloi takime me krerët e shtetit./vizionplus.tv