Zgjedhjet në komunat me shumicë serbe në veri të Kosovës u bojkotuan masivisht. Nga mbi 45.000 qytetarë, morën pjesë vetëm 1567 prej tyre.

Sipas të dhënave të KQZ-së, në Mitrovicën e Veriut fitoi kandidati i Lëvizjes Vetëvendosje, Erden Atiq, me 519 vota. Atiq deklaroi se do të jetë kryetar i të gjithë banorëve të Mitrovicës së Veriut.

 I falënderoj të gjithë ata edhe që s’më kanë votu, do të jem kryetar komune i të gjithë qytetarëve pa dallim. Po na presin punë të mëdha përpara. I bej të gjithë qytetarëve që të kenë besim në institucionin e komunës edhe tekune si kryetar komune”

Lëvizja Vetëvendosje fitoi po ashtu në Komunën e Leposaviqit, me kandidatin Lulzim Hetemi. Ndërkohë Partia Demokratike do të drejtojë Zubin Potokun me Izmir Zeqirin si dhe Zveçanin me Ilir Pecin.

Ndërkohë Kryeministri i Kosovës, Albin Kurti, e justifikoi pjesëmarrjen e ulët në zgjedhjet e parakohshme lokale në veri, me atmosferën “e frikësimit dhe shantazhit”.

“Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri. I falënderoj qytetarët për kurajën dhe qetësinë”, shkroi Kurti në rrjetin social Facebook.

Pjesëmarrja më e madhe në votime ishte në radhët e komunitetit shqiptar në komunat veriore të Kosovës. Megjithatë, krahasuar me herët e kaluara, as komuniteti shqiptar, që është shumicë në disa qendra të votimit, nuk e shfrytëzoi sa duhet të drejtën e votës. Në qendrën e votimit në fshatin Lipë, nga 205 qytetarë me të drejtë vote, votuan vetëm 31% e tyre. Ambasada Amerikane shprehu keqardhje, që jo të gjitha partitë shfrytëzuan të drejtën demokratike për të marr pjesë në garë.