Rrugët mund të jenë të rrezikshme për një sërë arsyesh; terrene të rrezikshme, por edhe të sheshta e të drejta që i joshin drejtuesit e makinave të shtojnë shpejtësinë. Shoqata Amerikane e Automobilave ka përpiluar një listë me rrugët më të rrezikshme në vend, duke përdorur informacionin e mbledhur nga faqet zyrtare të qeverisë, si dhe raportet e lajmeve. Nga Florida ku ndodh një vdekje për çdo kilometër, në një autostradë në Alaskë pa pika karburanti ose ndalesa pushimi për gati 300 km, këto janë rrugët më të rrezikshme në Amerikë.

US Route 550, Kolorado 

E njohur zyrtarisht si US Route 550, autostrada miliona dollarëshe e Kolorados thuhet se është emëruar kështu pasi një udhëtare, shumë kohë më parë, tha se do të hynte sërish në këtë rrugë vetëm po të merrte 1 milionë dollarë. Rruga gjarpëron përmes Qafës së Malit të Kuq në vargmalet San Juan. Drejtuesit e mjeteve ndeshen me shkëmbinj të pjerrët dhe kthesa të forta teksa ngjiten në autostradë. Rruga e ndërtuar anash maleve nuk ka parmakë. Moti i ashpër i Kolorados, si dhe rënia e gurëve nga lart e bëjnë US Route 550 një nga rrugët më të rrezikshme në vend.

US Route 1, Florida 

Sipas një studimi të fundit, Florida ka 17 nga 100 rrugët më vdekjeprurëse në vend. Hulumtimi analizoi totalin e vdekjeve midis viteve 2015 dhe 2019 dhe zbuloi se ishte rruga e dytë më vdekjeprurëse e vendit me 87 vdekje. Fundi jugor i rrugës, i njohur si Autostrada Overseas, lidh Florida Keys me Miami-n dhe përbëhet nga ura të gjata me kilometra të tëra, të cilat disa shoferë i shohin si shqetësuese dhe shpërqendruese.

Pontchartrain Causeway, Luiziana 

Pontchartrain Causeway 39 km e gjatë mban rekordin botëror të Guinness për urën më të gjatë mbi ujë. Duhet rreth gjysmë ore për të kaluar urën përgjatë liqenit. Të rrethuar nga uji, drejtuesit e mjeteve janë të rrezikuar nga shumë elemente, sidomos nëse rruga pushtohet nga mjegulla e dendur. Ndonjëherë kushtet janë aq të këqija saqë policia duhet të shoqërojë shoferët përtej liqenit.

I-4, Florida 

Interstate 4, që kalon midis Tampa-s dhe Daytona Beach, është një nga më vdekjeprurëset në vend, duke regjistruar 1 vdekje për kilometër. Kjo ka të ngjarë të ndodhi pasi rruga kalon pikërisht përmes Orlandos, i cila tërheq turistë nga e gjithë bota për të vizituar Walt Disney World dhe Universal Studios dhe shumica e vizitorëve nuk janë mësuar të ngasin makinën në Amerikë. 

I-45, Teksas

Rruga ndërshtetërore midis Galveston dhe Dallas është jashtëzakonisht e mbingarkuar, veçanërisht pasi kalon drejtpërdrejt në qendër të Dallasit. Në këtë rrugë ndodhin 56 aksidente fatale për çdo 160 km rrugë, për shkak të lëvizjeve të ngarkuara dhe shpejtësisë së lartë.

I-10, Arizona  

Kjo rrugë kalon nga Florida në Kaliforni dhe pikërisht shtrirja e gjatë e autostradës nëpër shkretëtirë i bën drejtuesit e mjeteve të shpejtojnë dhe të kryejnë manovra të rrezikshme ndaj shoferëve të tjerë. Autostradës i mungojnë parmakët dhe një barrierë qendrore që ndan anët e kundërta, çka krijon një rrezik edhe më të madh. Gati 500 vdekje u regjistruan në autostradën I-10 të Arizonës gjatë gjashtëvjeçarit të fundit.

I-15 midis Las Vegas, Nevada dhe Los Anxhelos

Kjo autostradë është një rrugë e drejtë, e mirëmbajtur mirë, por shpesh renditet si një nga më të rrezikshmet e vendit. Sipas një studimi 15-vjeçar, I-15 është rruga më vdekjeprurëse në vend. Motoristët shpesh ecin me një shpejtësi marramendëse nëpër shkretëtirën Mojave.

Autostrada 17 në Karolinën e Jugut 

Autostrada 17 e Karolinës së Jugut kalon nëpër pyje, këneta dhe qytete buzë oqeanit duke e bërë atë një nga udhëtimet më piktoreske në juglindje. Por rruga është gjithashtu e mbushur me një numër të madh kthesash të mprehta, qoshesh dhe korsish të ngushta. Kjo krijon një rrugë potencialisht të rrezikshme. Një studim e shpalli atë si autostradën më të rrezikshme të vendit për udhëtime gjatë verës.

Autostrada James Dalton   

Autostrada James Dalton kalon nga Fairbanks në Deadhorse, përgjatë brigjeve të Oqeanit Arktik. Rruga me papastërti dhe zhavorr u ndërtua në vitin 1974 për të ndihmuar industrinë e naftës dhe ende përdoret kryesisht për transportin e naftës. James Dalton përshkon disa nga terrenet më të pabesa të Alaskës, duke përfshirë pyjet, tundrat dhe lumin Yukon. Autostradën e bën të rrezikshme edhe fakti që në një shtrirje prej 300 km nuk ka asnjë pikë karburanti ose vend pushimi.

Autostrada Montana 2 

Autostrada Montana 2 është një rrugë e drejtë dhe në dukje e parrezikshme duke i shtyrë shoferët të rrisin shpejtësinë. Përveç kësaj, duke qenë larg zonave urbane, nëse shoferët hasin probleme, duhet të vozisin gati një orë për të marrë ndihmë urgjente.

Maui, rruga Havai për në Hana 

Rruga prej 84 km në Maui të Havait lidh Kahuluin me Hana-n përgjatë vijës bregdetare të thyer të ishullit. Autostrada ofron pamje piktoreske të maleve dhe pyjeve tropikale, por drejtuesit e makinave duhet të jenë shumë të kujdesshëm. Rruga ka 620 kthesa dhe 59 ura të ngushta që do të thotë se shoferëve u duhen deri në katër orë për të vozitur përgjatë saj. Për këtë, Autoriteti i Turizmit në Havai rekomandon udhëtimin me një kompani turistike.