Nga Aranit Muraçi
Kryeministri Edi Rama kur hapi fushatën, sulmoi ashpër disa eksponentë të opozitës. Mes tyre, veç ish-kryeministrit Sali Berisha dhe presidentit Ilir Meta, më e goditura prej tij ishte edhe Grida Duma, ose “gridarja” siç e quajti ai.
Demokratët besonin gjerësisht se Grida Duma do të udhëhiqte fushatën e kryeqytetit, derisa doli lista zyrtare.
Por kryetari i Partisë Demokratike, Lulzim Basha, si për çudi i kishte “miratuar” me kohë sulmet politike të Ramës duke e transferuar Grida Dumën në Rrogozhinë. Ndërsa kryeqytetin dhe numrin “2” Basha ia besoi rivales së saj në parti, Jorida Tabakut.
Grida thuajse është harruar edhe nga mediat e djathta gjatë fushatës. Në të kundërt Jorida Tabaku, e pasulmuar asnjë ditë politikisht nga PS-ja, po shfaqet si në “mediat” e Ramës, ashtu edhe si më e preferuara e Bashës, në parti.
Basha ishte dje në Rrogozhinë. Pavarësisht pakënaqësisë së saj, Grida Duma shfaqi entuziazmin e fitores bashkë me elektoratin.
Me shpresë se diçka do të ndryshojë pas 25 prillit dhe do të rimarrë pozitat që pretendon në parti, Grida Duma mësohet se nuk e ka fshehur tërë këto ditë zhgënjimin e saj nga Rama dhe Basha, madje i druhej ndonjë marrëveshje të fshehtë mes tyre, çka ashpërsoi konkurencën dhe përmbysi ambicjet e saj në parti.
A po distancohet vërtet Basha nga ata që nuk preferon Rama në PD, si kusht për t’u përgatitur para një bashkqeverisjeje pas 25 prillit?
Dhe e njëjta strategji po ndodh edhe me PS-në që në krye të qarqeve aktivizoi emra të rinj, me të cilët partia më e madhe opozitare mund të bashkëpunojë, me justifikimin e thjeshtë: për të ardhmen e Shqipërisë në BE, sipas modelit aktual gjerman.
Dhe kështu PS dhe PD mbeten duke mbajtur njëra-tjetrën, sikurse besohet prej tyre se ka ardhur koha të shkrihen të gjitha partitë e tjera!
Pavarësisht qejfmbetjes së momentit nga Grida Duma!