Ish-presidenti Hashim Thaçi është deklaruar i pafajshëm lidhur me akuzat e fundit të Prokurorisë Speciale për pengim të drejtësisë në Dhomat e Specializuara të Kosovës në Hagë.

Aktakuza e re kundër Thaçit dhe katër personave të tjerë – ish-ministrit të Drejtësisë, Hajredin Kuçi, ish-shefit të Agjencisë për Inteligjencë, Bashkim Smakaj, ish-kryetarit të Malishevës, Isni Kilaj, dhe Fadil Fazliut – u konfirmua dhe u bë publike muajin e kaluar.

Thaçi, i cili po gjykohet në Hagë për një rast të ndarë që lidhet me krime lufte dhe krime kundër njerëzimit, së bashku me personat e tjerë akuzohen se tentuan të ndikojnë te dëshmitarët e rastit të parë.

Prokurori i çështjes ka deklaruar se prokuroria synon të thërrasë të paktën tre persona për të dëshmuar kundër Thaçit dhe të akuzuarve të tjerë në gjyqin për pengim të drejtësisë.

Ndërkohë, Thaçi, Kuçi, Kilaj dhe Fazliu janë deklaruar të pafajshëm, ndërsa Smakaj ende nuk është deklaruar.

Në javët e fundit, Hashim Thaçi ka kërkuar disa herë që Specialja të respektojë Kushtetutën dhe ligjet e Kosovës, duke përmendur se akuzat e reja vijnë vetëm pak para zgjedhjeve parlamentare. /vizionplus.tv